O Goberno local atende unha petición da Comisión Promotora das Cacharelas para iniciar os trámites ante Xunta e Estado
A Corporación municipal aprobou no pleno desta mañá solicitar a declaración das Cacharelas de San Juan como Festa de Interese Turístico Internacional, unha distinción que permitirá impulsar a promoción e divulgación deste evento que está a realizar o actual equipo de goberno co apoio do resto de colectivos cidadáns implicados no proxecto.
Ao inicio da sesión plenaria, o alcalde da Coruña, Carlos Negreira, tamén leu unha declaración para conmemorar que o próximo 8 de marzo é o Día Internacional das Mulleres, “un día para a reflexión, o debate e denuncia da situación diferencial de homes e mulleres nas distintas esferas da súa vida”. Deste xeito, o Concello adhírese á declaración aprobada pola Federación Española de Municipios e Provincias (FEMP). “O Concello da Coruña quere recoñecer e eloxiar o papel de todas as mulleres e homes, que publicamente defenden a diario a igualdade de xénero, cuestionando calquera norma social discriminatoria, polo que animamos a todo o mundo a participar nunha campaña na que a proximidade á cidadanía é fundamental”, concluíu o alcalde.
SAN JUAN
A Corporación municipal aprobou solicitar á Xunta que realice as xestións necesarias ante a Secretaría de Estado de Turismo para obter para as Cacharelas de San Juan a declaración de Festa de Interese Turístico Internacional. O tenente de alcalde de Emprego e Empresa e responsable municipal da área de Turismo, Luisa Cid, destacou o “enorme arraigamento multitudinario” das Cacharelas de San Juan, con máis de 150.000 persoas participantes cada ano nas actividades e accións de promoción desta festa que se desenvolveron neste mandato.
A aprobación desta solicitude por parte do pleno lévase a cabo a raíz da proposta que presentou ao alcalde, Carlos Negreira, a Comisión Promotora das Cacharelas de San Juan. Trátase dun proceso necesario, xa que este tipo de solicitudes deben ir acompañadas do acordo do pleno do municipio no que se celebre a festa e do informe favorable da comunidade autónoma, que á súa vez deberá remitir a petición ao Estado -á Secretaría de Estado de Turismo-, órgano que finalmente aproba ou rexeita a declaración. A festa candidata tamén debe estar declarada Festa de Interese Turístico Nacional no momento da solicitude e telo estado, polo menos, durante os cinco anos inmediatamente anteriores. As Cacharelas de San Juan gozan desta distinción dende o 30 de xuño de 2003.
Luisa Cid subliñou o labor de promoción desenvolvida polo actual equipo de goberno, que traballou “man a man” coa sociedade co obxectivo de ofrecer máis actividades e programación con motivo do San Juan, unhas accións dirixidas a todos os públicos que, á súa vez, tamén contribúen a xerar máis emprego e turismo. Neste sentido, recordou a decisión de establecer as Cacharelas de San Juan como festivo local.
OS ROSALES
No pleno celebrado esta mañá, o Goberno municipal aprobou de xeito definitivo, co apoio do PSOE e a abstención de BNG e EU-Os Verdes, os estudos de detalle que permiten a ampliación de dous equipamentos situados no barrio Dos rosales. En concreto, trátase das instalacións de dúas entidades benéficas que traballan a favor dos que máis o necesitan: Fundación Remanso e Pía Unión La Obra de la Señora.
Tras aprobarse ambos os dous estudos de detalle de xeito inicial en Xunta de Goberno e poñelos a exposición pública, o Concello non recibiu alegacións a estes expedientes. No caso da residencia de maiores da Fundación Remanso, que se encontra nunha parcela municipal en réxime de concesión, o estudo de detalle recolle a construción de
tres novas edificacións, cunha superficie total de 1.662 metros cadrados, o que completará o equipamento actual formado por dous volumes comunicados (un de planta baixa e outro de planta baixa máis cinco alturas).
O segundo estudo de detalle corresponde á ordenación de volumes dunha parcela da travesía Dos rosales, o que permitirá mellorar as instalacións actuais de Pía Unión
A Obra da Señora. En concreto, trátase de ampliar nunha planta dous dos tres edificios existentes para crear unha sala de rehabilitación e fisioterapia para residencia de maiores; e noutras dúas alturas o inmoble dedicado na actualidade a sala de usos múltiples para dotalo de centro de día.
Esta entidade presta servizo actualmente aos maiores e persoas en risco de exclusión, para o que dispón de 116 prazas residenciais situadas en tres edificacións independentes
(59 dedicadas ao centro de maiores, 36 no centro de inclusión social para homes,
e 21 no centro de inclusión social para mulleres e nenos). A ampliación de superficie proposta neste estudo de detalle, que se desenvolvería en dúas fases, é de 1.019 metros cadrados, polo que, sumada á edificabilidade xa existente, alcanzaríanse os 5.842
metros cadrados.
“Este Goberno municipal é o que máis se comprometeu en Galicia cos servizos sociais, con 61 millóns de euros neste mandato, é dicir, 13,5 millóns máis que no cuadrienio do bipartito. Neste mandato, triplicamos o investimento en Emerxencia Social, duplicouse para o Talón Restaurante e non hai lista de espera en Teleasistencia e en Comedor Escolar”, recordou o tenente de alcalde de Medio, Territorio e Infraestruturas, Martín Fernández Prado.
OUTROS ASUNTOS
O tenente de alcalde de Infraestruturas e responsable da área de Rehabilitación tamén lamentou que o PSOE presentase unha moción ao pleno municipal para solicitar a declaración do Barrio das Flores como Área de Rehabilitación Integral (ARI). Fernández Pradoexplicou que o actual equipo de goberno xa tramitou esta petición, ao tempo que xa se elaborou un plan director de rehabilitación para este barrio.
O Concello encóntrase agora á espera de que a Xunta resolva esta solicitude. O concelleiro indicou que a decisión de propoñer a declaración do Barrio das Flores como ARI se suma a un compromiso municipal coas políticas de rehabilitación, cun 50% máis de vivendas que se beneficiaron das subvencións durante este mandato e un 30% máis de investimento. A maiores, fóra das áreas de rehabilitación integral, a achega anual media deste equipo de goberno alcanza os 1,97 millóns de euros, nove veces máis que na etapa do bipartito.
Por último, o pleno tomou coñecemento da adxudicación do posto de secretario xeral a Manuel José Díaz Sánchez, quen se encargaba desta tarefa en comisión de servizos dende outubro de 2011. Á convocatoria pública para a provisión deste posto polo sistema de libre designación presentáronse cinco solicitudes.
